30 дахь удаагийн Ой тогтоолтын дэлхийн аварга шалгаруулах тэмцээнд Монгол Улсын 2021 оны шигшээ баг амжилттай оролцож дэлхийн хошой аварга боллоо.

Цар тахлын улмаас 30 дахь удаагийн “Ой тогтоолтын дэлхийн аварга шалгаруулах тэмцээн” онлайнаар зохион байгуулагдсан. Нийт 18 улсын шилдэг 366 тамирчин ой тогтоолтын спортын 10 төрлөөр өрсөлджээ. Монгол Улсаа төлөөлөн Монголын оюун ухааны академийн 10-24 насны 17 тамирчин, олон улсын шүүгч, дасгалжуулагч Б.Баасандорж,  Ө.Сэнгэсамдан гэсэн бүрэлдэхүүнтэй оролцжээ.

Тэмцээний дүн өнөөдөр гарсан бөгөөд Монгол Улсын 2021 шигшээ багын таван тамирчин олон улсын мастерын цолны болзол хангаж, олон улсын их мастер /2017 оны дэлхийн аварга, Гиннесийн рекорд эзэмшигч/ Н.Мөнхшүр дэлхийн хошой аварга боллоо. Мөн 30 дахь удаагийн Ой тогтоолтын дэлхийн аварга шалгаруулах тэмцээнд 21,435 оноогоор Монгол Улсын шигшээ баг тэргүүн байр эзэллээ.